இஸ்லாமாபாத்தில் அண்மையில் நடந்த தற்கொலைத் தாக்குதலைத் தொடர்ந்து பாகிஸ்தானில் தமது விளையாட்டு நடவடிக்கைகளைத் தொடர இலங்கை கிரிக்கெட் அணி எடுத்த தீர்மானத்துக்காக இலங்கை அரசாங்கத்திற்கும் ஸ்ரீலங்கா கிரிக்கெட் வாரியத்துக்கும் நன்றி தெரிவிக்கும் தீர்மானத்தை பாகிஸ்தான் செனட் சபை வியாழக்கிழமை (14) நிறைவேற்றியுள்ளது.
இந்த தீர்மானத்தை செனட்டில் சட்ட அமைச்சர் அசாம் நசீர் தரார் முன்வைத்தார்.
அவர் இலங்கையின் உறுதியான ஆதரவையும் ஒற்றுமையையும் தீர்மானத்தில் பாராட்டினார்.
மேலும், பயங்கரவாதத்தின் துயரமான செயலுக்கு மத்தியிலும் பாகிஸ்தானில் விளையாட்டுகளைத் தொடர்ந்ததற்காக இலங்கை அதிகாரிகளுக்கு நாங்கள் நன்றியுள்ளவர்களாக இருக்கிறோம் – என்று அவர் சுட்டிக்காட்டினார்.
பாகிஸ்தானில் தங்கியிருக்கும் போது இலங்கை கிரிக்கெட் அணிக்கு முழுமையான பாதுகாப்பு வழங்கப்படும் என்றும் அந்தத் தீர்மானம் உறுதியளித்தது.
பதட்டமான பாதுகாப்பு சூழ்நிலையில் வீரர்கள், அதிகாரிகள் மற்றும் குடிமக்களின் பாதுகாப்பை உறுதி செய்வதற்காக பாகிஸ்தான் பாதுகாப்புப் படையினரின் முயற்சிகளையும் இந்தத் தீர்மானம் பாராட்டியது.
இஸ்லாமாபாத் நீதித்துறை வளாகத்திற்கு அருகே கடந்த செவ்வாய்க்கிழமை நடந்த தற்கொலை குண்டுவெடிப்பைத் தொடர்ந்து, இலங்கை அணி முதலில் நாடு திரும்ப முடிவு செய்திருந்தது.
எனினும், மேம்படுத்தப்பட்ட பாதுகாப்பு ஏற்பாடுகள் உறுதி செய்யப்பட்ட பின்னர், அணி தனது முடிவை வாபஸ் பெற்று பாகிஸ்தானில் தொடர்ந்து விளையாடத் தேர்வு செய்தது.
இது இரு நாடுகளுக்கும் இடையே வலுவான நம்பிக்கை மற்றும் விளையாட்டு உணர்வை வெளிப்படுத்தியது.
இது தொடர்பில் ஒரு அறிக்கையை வெளியிட்ட ஸ்ரீலங்கா கிரிக்கெட், எந்தவொரு வீரரும் இலங்கைக்குத் திரும்ப விரும்பினால், தொடர் எந்த இடையூறும் இல்லாமல் தொடர்வதை உறுதி செய்வதற்காக வீரர்கள் மாற்றப்படுவார் என்று தெளிவுபடுத்தியது.
இதேவேளை, பாகிஸ்தான் மற்றும் இலங்கை அணிகளுக்கு இடையிலான மீதமுள்ள ஒருநாள் சர்வதேச போட்டிகளுக்கான திருத்தப்பட்ட அட்டவணையை பாகிஸ்தான் கிரிக்கெட் வாரியத்தின் தலைவர் மொஹ்சின் நக்வி நேற்று அறிவித்தார்.
அவரது அறிவிப்பின்படி, இரு அணிகளுக்கும் இடையிலான மீதமுள்ள ஒருநாள் போட்டிகள் நவம்பர் 14 மற்றும் 16 ஆகிய திகதிகளில் ராவல்பிண்டியில் நடைபெறும் என்று தெரிவிக்கப்பட்டது.
அதேநேரம், பாகிஸ்தான், இலங்கை மற்றும் சிம்பாப்வே அணிகள் பங்கேற்கும் வரவிருக்கும் டி20 முத்தரப்பு தொடருக்கான திருத்தப்பட்ட அட்டவணையையும் பாகிஸ்தான் கிரிக்கெட் வாரியம் வெளியிட்டது.
திருத்தப்பட்ட அட்டவணையின்படி, இறுதிப் போட்டி உட்பட ஏழு டி:20 போட்டிகளும் ராவல்பிண்டி கிரிக்கெட் மைதானத்தில் நடைபெறும்.
அடுத்த ஆண்டு இந்தியா மற்றும் இலங்கையில் நடைபெறும் டி:20 உலகக் கிண்ணத்துக்கான முக்கிய ஆயத்தமாகக் கருதப்படும் இந்தத் தொடர், முதலில் லாகூரில் ஐந்து போட்டிகளைக் கொண்டிருந்தது.
முத்தரப்புத் தொடரின் தொடக்க ஆட்டம் நவம்பர் 18 அன்று பாகிஸ்தான் மற்றும் சிம்பாப்வே இடையே நடைபெறும்.
முத்தரப்பு தொடர்பில் ஒவ்வொரு அணியும் நான்கு போட்டிகளில் பங்கேற்கும்.
அதில் முதல் இரண்டு இடங்களை பிடிக்கும் அணிகள் நவம்பர் 29 அன்று திட்டமிடப்பட்ட இறுதிப் போட்டிக்கு தகுதி பெறும்.
செவ்வாய்க்கிழமை இஸ்லாமாபாத்தில் நடந்த தற்கொலைக் குண்டுவெடிப்பில் 12 பேர் உயிரிழந்ததுடன், 27 பேர் காயமடைந்தமையும் குறிப்பிடத்தக்கது.
