ரஷ்யா ஐரோப்பாவுடன் போரில் ஈடுபடுவது உறுதி – உக்ரைனுக்கு ஆதரவை வலுப்படுத்துமாறு முன்னாள் அமெரிக்க ஜெனரல் வலியுறுத்தல்!

ஐரோப்பாவிற்கான முன்னாள் அமெரிக்க இராணுவத் தளபதி பென் ஹாட்ஜஸ் (Ben Hodges), “நாம் ஒப்புக்கொண்டாலும் இல்லாவிட்டாலும், ரஷ்யா நிச்சயமாக ஐரோப்பாவுடன் போரில் ஈடுபட்டுள்ளது” என்று எச்சரித்துள்ளார்.

ஒஸ்லோவில் நடைபெற்ற மாநாட்டில் பேசிய ஹாட்ஜஸ், ரஷ்யாவின் நடவடிக்கைகளை “ஹைப்ரிட் போர்” (hybrid warfare) என்று அழைப்பது தவறானது மற்றும் திசைதிருப்பக்கூடியது என்று கூறினார்.

இது ரஷ்யாவின் விரோத நடவடிக்கைகளின் உண்மையான தீவிரத்தை வெளிப்படுத்தவில்லை என்பது அவரது கருத்து.

“ஐரோப்பிய நாடுகள் உக்ரைனுக்கு வழங்கும் ஆதரவை நிறுத்த வேண்டும் என்பதே ரஷ்யர்களின் விருப்பம்.
அவர்கள் செய்யும் செயல்களுக்காக நாம் அவர்களுக்குத் தகுந்த பதிலடி கொடுக்கும் வரை, இது ஒவ்வொரு நாளும் தொடரத்தான் செய்யும்,” என்று அவர் எச்சரித்தார்.

மேலும், ஐரோப்பா உக்ரைனுக்கு ஆதரவளிப்பதிலும், தனது பாதுகாப்புத் திறனை மேம்படுத்துவதிலும் கவனம் செலுத்த வேண்டும் என்று அவர் கூறினார்.

ஆப்கானிஸ்தானில் நேட்டோ (NATO) படைகளின் தியாகம் குறித்து அமெரிக்க ஜனாதிபதி டொனால்ட் ட்ரம்ப் மற்றும் அவரது பாதுகாப்புச் செயலாளர் பீட் ஹெக்செத் ஆகியோரின் சமீபத்திய கருத்துக்களால் தான் மிகுந்த கோபமடைந்துள்ளதாகவும், அதைக் கேட்டு தனது “வயிறு குமட்டுவதைப்” போன்ற உணர்வு ஏற்பட்டதாகவும் ஹாட்ஜஸ் மேலும் தெரிவித்தார்.