இலங்கை ஏற்றுமதிக்கு அமெரிக்கா விதித்துள்ள தீர்வை வரிகளை குறைப்பது தொடர்பில் ஜனாதிபதி அநுரகுமார திசாநாயக்கவிற்கும் அமெரிக்காவின் வர்த்தக முகவர் அலுவலகத்தின் தூதுவர் ஜேமிசன் கிரியருக்கும் இடையில் இணையவழி கலந்துரையாடல் ஒன்று இடம்பெற்றுள்ளது.
தீர்வை வரிகளை குறைப்பது மற்றும் இரு நாடுகளுக்கும் இடையிலான வர்த்தக மற்றும் முதலீட்டு உறவுகளை மேம்படுத்துவது தொடர்பாகவும் கவனம் செலுத்தப்பட்டது.
அமெரிக்காவுக்கு இறக்குமதி செய்யப்படும் ஆடைகள் உள்ளிட்ட பொருட்களுக்காக அனைத்து நாடுகளுக்கும் தீர்வை வரி விதிப்பதற்கு கடந்த ஏப்ரல் 3 ஆம் திகதி அந்த நாட்டு அரசாங்கம் தீர்மானம் மேற்கொண்டது.
இதன்பிரகாரம் இலங்கைக்கு நூற்றுக்கு 44 வீத வரி விதிப்பதற்கு அமெரிக்க அரசாங்கம் தீர்மானம் மேற்கொண்டது.
இந்த நிலையில் தீர்வை வரியை குறைப்பது தொடர்பில் இலங்கை அரசாங்கம் கலந்துரையாடல்களை மேற்கொண்டது.
இதன்பிரதிபலனாக இலங்கைக்கு விதிக்கப்பட்டிருந்த 44 வீத தளர்வை வரி ஜூலை 12 ஆம் திகதி 30வீதமாக குறைக்கப்பட்டது.
எனினும் இந்த தீர்வை வரி வீதம் மேலும் குறைக்கப்பட வேண்டும் என பலரும் குற்றச்சாட்டுக்களை முன்வைத்திருந்தனர்.
இவ்வாறான நிலையில் தீர்வை வரி குறைப்பு தொடர்பாக இலங்கை பிரதிநிதிகள் அமெரிக்காவுடன் கலந்துரையாடல்களை முன்னெடுத்திருந்தனர்.
இதன் ஒரு அங்கமாக இலங்கை பிரதிநிதிகள் கடந்த 18 ஆம் திகதி அமெரிக்க வர்த்தக பிரதிநிதிகளுடன் தீர்வை விரி குறைப்பு தொடர்பாக கலந்துரையாடியிருந்தனர்.
இந்த கலந்துரையாடலில் நிதி அமைச்சின் செயலாளர் ஹர்ஷன சூரியப்பெரும உள்ளிட்ட உயர்மட்ட அதிகாரிகள் இணையவழி ஊடாக பங்கேற்றிருந்தனர்.
இந்த நிலையில் இலங்கை ஏற்றுமதிக்கு அமெரிக்கா விதித்துள்ள தீர்வை வரிகளை குறைப்பது தொடர்பில் ஜனாதிபதி அநுரகுமார திசாநாயக்கவிற்கும் அமெரிக்காவின் வர்த்தக முகவர் அலுவலகத்தின் தூதுவர் ஜேமிசன் கிரியருக்கும் இடையிலான இணையவழி கலந்துரையாடல் நேற்றுமுன்தினம் இடம்பெற்றது.
இலங்கை மீது விதிக்கப்பட்டுள்ள தீர்வை வரிகளை குறைப்பது மற்றும் இரு நாடுகளுக்கும் இடையிலான வர்த்தக மற்றும் முதலீட்டு உறவுகளை மேம்படுத்துவதை நோக்கமாக கொண்டு இந்தக் கலந்துரையாடல் இடம்பெற்றது.
இந்த கலந்துரையாடலில் நிதி அமைச்சின் செயலாளர் கலாநிதி ஹர்ஷன சூரியப்பெரும மற்றும் அமெரிக்க வர்த்தக முகவர் அலுவலக அதிகாரிகளும் கலந்துகொண்டமை குறிப்பிடத்தக்கது.
