ஆசியாவின் இரண்டு முன்னணி பொருளாதார நாடுகளுக்கு இடையே அதிகரித்து வரும் இராஜதந்திர பதற்றங்களுக்கு மத்தியில், ஜப்பானிய கடல் உணவுகளின் அனைத்து இறக்குமதியையும் தடை செய்வதாக சீனா இன்று (19) ஜப்பானிடம் தெரிவித்ததாக ஊடகங்கள் செய்தி வெளியிட்டுள்ளன.
இந்த மாதம் தாய்வான் மீதான சீனத் தாக்குதல் ஜப்பானின் உயிர்வாழ்வை அச்சுறுத்தும் என்று புதிய ஜப்பானியப் பிரதமர் சானே தகைச்சி (Sanae Takaichi) கூறியதைத் தொடர்ந்து இரு நாடுகளுக்கும் இடையே பதற்றங்கள் மூண்டன.
தனது கருத்துக்களைத் திரும்பப் பெறுமாறு சீனா, டோக்கியோவை கோரியுள்ளதுடன் தனது குடிமக்கள் ஜப்பானுக்குப் பயணம் செய்ய வேண்டாம் என்று வலியுறுத்தியுள்ளது.
இதன் விளைவாக உலகின் நான்காவது பெரிய பொருளாதாதார நாட்டிற்கு கணிசமான அடியான வெகுஜன பயணங்கள் இரத்து செய்யப்பட்டன.
2023 ஆம் ஆண்டில் டோக்கியோ தனது புகுஷிமா அணுமின் நிலையத்திலிருந்து சுத்திகரிக்கப்பட்ட கழிவுநீரை வெளியேற்ற முடிவு செய்ததால் விதிக்கப்பட்ட ஜப்பானிய கடல் உணவுகள் மீதான கட்டுப்பாடுகளை பெய்ஜிங் சில மாதங்களுக்கு முன்பு ஓரளவு தளர்த்தியதைத் தொடர்ந்து ஜப்பானுக்கு அண்மைய சிக்கல் ஏற்பட்டுள்ளது.
நீர் வெளியேற்றத்தை மேலும் கண்காணிக்க வேண்டியதன் காரணமாகவே மீண்டும் தடை விதிக்கப்பட்டுள்ளதாக சீனா, ஜப்பானிடம் தெரிவித்துள்ளதாக நம்பகத் தகுந்த வட்டாரங்களை மேற்கொள்காட்டி கியோடோ செய்திச் சேவை இந்த தகவலை வெளியிட்டுள்ளது.
Related
