ஆலையடிவேம்பு பிரதேச அக்கரைப்பற்று – சாகாமம் வீதியில் பாதசாரி கடவையை காணவில்லை என மக்கள் தேடுகிறார்கள்.

அக்கரைப்பற்று சாகாமம் வீதியில் அர்ச்சனா திரையரங்கிற்கு எதிரே அமைந்திருக்கும் விவேகானந்தா வீதியில் பிரதான வீதியில் இருந்து சுமார் 100 மீற்றர் தூரத்தில் அக்கரைப்பற்று, விவேகானந்தா வித்தியாலயம் அமைந்திருக்கிறது.

பாடசாலைக்கு வரும் மாணவர்கள் மற்றும் பெற்றோர்கள் பிரதான பாதையை கடந்தே பாடசாலைக்கு செல்வதும் மற்றும் பாடசாலை முடிந்து வருவதும் வழக்கம்.

இவ்வாறு இருக்கையில் குறித்த பிரதான வீதியை அண்டிய பகுதியில் பாதையை கடக்கும் பாதசாரி கடவை இல்லை என பெற்றோர்கள், பொதுமக்கள் என அனைவரும் விசனம் தெரிவிக்கின்றனர்.

குறித்த வீதி பகுதியின் அமைவிடத்தை ஆராயும் போது நிச்சயமாக பாதசாரி கடவை அந்த இடத்தில் அமைவதற்கான அனைத்து முகாம்திரமும் காணப்படுகிறது.

திரையரங்கம், அண்மையில் பாடசாலை, அண்மையில் மாணவர்களுக்கு பிரத்தியேக வகுப்பு நடைபெறுவது, அதிகளவான வர்த்தக நிலையங்கள், அண்மித்த பகுதியில் எங்கும் பாதசாரி கடவை இல்லை மற்றும் வாகனங்கள் எப்போதும் சென்று வரக்கூடிய பிரதான உயிர்ப்பான பகுதி என காரணங்கள் பல இருக்குறது.

குறித்த வீதியை உன்னிப்பாக அவதானித்த போது பாதசாரி கடவைக்கான அடையாள பலகை (sign board) வீதி ஓரத்தில் தற்போதும் நிறுவப்பட்டு இருக்கிறது.

இந்த பாதை அமைப்பதற்கு வடிவமைக்கும் போது பாதசாரி கடவை அமைக்கப்பட வேண்டும் என தீர்மானித்திருக்கிறார்கள் வடிவமைத்திருக்கிறார்கள் என்பதை உணரமுடிகிறது.

இது தொடர்பாக பிரதேச மக்களிடம் வினவியபோது முன்னொரு காலத்தில் மஞ்சள் நிறத்தில் பாதசாரி கடவை இருந்ததாகவும். காலப்போக்கில் அது அழிந்து போய்விட்டதாகவும் தெரிவித்திருந்தார்கள்.

மஞ்சள் நிற பாதசாரி கடவை 2016 ஆம் ஆண்டு வீதி அபிவிருத்தி அதிகார சபையினரின் தீர்மானத்திற்கு அமைவாக வெள்ளை நிறமாக மாற்றம் செய்யப்பட்டது என்பது குறிப்பிடத்தக்கது.

தற்போது பாதசாரி கடவைக்கான அடையாள பலகை (sign board) இரண்டு மாத்திரம் காணப்பட்டாலும் பாதசாரி கடவைக்கான சாலை கோடுகள் (road lines) இல்லை.

இதனால் மாணவர்கள், பெற்றோர்கள் பொதுமக்கள் என அனைவரும் வீதியை கடக்கும் போது சிரமத்தையும் அபாயத்தையும் எதிர்நோக்குகிறார்கள்.

சம்மந்தப்பட்டவர்கள் குறித்த விடயங்களை கவனத்தில் கொண்டு இந்த பகுதியில் பாதசாரி கடவை அமைக்குமாறு கேட்டுக்கொள்கிறோம்.